ಸಗ್ಗದ ಸಿರಿ ಬಂತೊ ನಮ್ಮೂರಿಗೆ

A song welcoming the Spring.

ಸಗ್ಗದ ಸಿರಿ ಬಂತೊ ನಮ್ಮೂರಿಗೆ

ಸುಗ್ಗಿಯ ಸೊಬಗಿಂದ ನಮ್ಮೂರಿಗೆ

ಎತ್ತೆತ್ತಲೆತ್ತಲು ತೆನೆ ಚೆಲ್ಲಿ ಹಾಲ

ಚಿಲಿಪಿಲಿ ಹರಿಸಿತು ಹಕ್ಕಿಯ ಮೇಳ;

ಕಣ ಕಣದಲ್ಲೂ ಬಂಗಾರ ಜಾಲ-

ಬೆರಗಾಗಿ ನಿಂತಿತೊ ಚಲಿಸದೆ ಕಾಲ.

ಸಗ್ಗದ ಸಿರಿ ...

ಅರಸಿನ ಕುಂಕುಮ ಮೈಗೆಲ್ಲ ಮೆತ್ತಿ

ಹಸುರುಟ್ಟ ನೆಲದವ್ವ ಮದುವಣಗಿತ್ತಿ 

ತೊಟ್ಟಿರೆ ಜರತಾರಿ ಮರಗಳ ನೆತ್ತಿ –

ದಿಬ್ಬಣ ಹೊರಟವೋ ಪಾತರಗಿತ್ತಿ

ಸಗ್ಗದ ಸಿರಿ...

ಕೊಟ್ಟಿಗೆ ತುಂಬ ಕರುಗಳ ಅಂಬಾ

ಆಕಳ ಕೆಚ್ಚಲು ಅಮೃತದ ಕುಂಭ!

ಹಟ್ಟಿಯ ಬೆಳಗಿದೆ ತುಂಬಿದ ಚೀಲ-

ತೀರಿತೊ ದೇವರೇ, ಬಡವರ ಸಾಲ.

ಸಗ್ಗದ ಸಿರಿ ...

ಚಾವಡಿ ಮುಂದಿಗೆ ಚಪ್ಪರವೆದ್ದು

ಸೇರಿತೊ ಊರೆಲ್ಲ – ಗುಜುಗುಜು ಸದ್ದು;

ಬೆಳುದಿಂಗಳಿರುಳಲ್ಲಿ ಬಯಲಾಟವಿದ್ದು –

ಗೌಡರೆ ನೋಡಲು ಬಂದರು ಖುದ್ದು.

ಸಗ್ಗದ ಸಿರಿ ...

ಹೂ ಕಾಯಿ ನೀಡೆವು ದೀಪವನುರಿಸಿ

ಬಾರಮ್ಮ ಮಾರಮ್ಮ, ಬಾ ಗೌರಿಯರಸಿ;

ಊರಾಚೆ ಹನುಮ, ಬಾ ನಮ್ಮ ಹರಿಸಿ –

ಶರಣು ಶರಣೆಂಬೆವು ತುಂಗೆಗೆ ನಮಿಸಿ.

ಸಗ್ಗದ ಸಿರಿ...

ಸಾಹಿತ್ಯ: ಕೆ. ಎಸ್. ನಿಸಾರ್ ಅಹಮದ್